На ден 07. 01. 2025 година, кога го празнуваме Христовото рождество – Божиќ, во македонскиот манастир „Свети Климент Охридски“ во Кинг Лејк, игуменот на манастирот отец Гаврил (Галев) отслужи Света Златоустова Литургија. На Литургијата присуствуваа голем број верни чеда, кои пристапија кон Светите Христови Тајни.

Големиот православен празник Рождество Христово – Божиќ торжествено со Свети божествени литургии беше прославен низ храмовите и црковните заедници при Австралиско-сиднејската православна епархија на Македонската православна црква – Охридска архиепископија. ХРИСТОС СЕ РОДИ! НАВИСТИНА СЕ РОДИ! Нека е за многу години!

На ден 06. 01. 2025 година, на Бадник во МПЦО „Свети вмч. Димитриј Солунски“ во Волонгонг, Сиднеј, протојерејот Томе Младеновски отслужи Света Василиева Литургија. На богослужението присуствуваше многуброен верен народ.

На ден 05. 01. 2025 година, во предвечерието на Бадник, во МПЦО „Свети Георгиј и Пресвета Богородица“ во Епинг, старешината на храмот јереј Климент Станковски отслужи Вечерна богослужба. После богослужбата беше изврешена литија на која учествуваа голем број млади македончиња на кои им беа поделен божикни пакетчиња. Духовната радост продолжи во црковниот двор, каде што се благослови празничниот колач со паричка.

На 05. 01. 2025 година,  во дваесет и осмата недела по Педесетница, кога го празнуваме споменот на Светиот преподобен Наум Охридски, чудотворец, во црковната општина „Света Недела“ во Голд Кост, јерејот Горан Божиновски  служеше Света Златоустова Литургија. На Светата Литургија, верниот народ се причести со Светите Христови Тајни.