Австралиско-сиднејската епархија како неоткинлив дел од Македонската православна црква – Охридска архиепископија најнапред изразува сочувство до семејствата на загинатите во трагичната несреќа во Кочани, како и надеж за брзо оздравување на сите повредени.
Во овие мигови на сенародна тага го известуваме нашиот верен народ дека во нашите епархиски храмови ќе се богослужат Свети заупокоени литургии и помени за упокоените и молитви за исцеление на повредените, како и за утешение на нивните семејства и ближни.
Во рамки на ова известување, воедно го повикуваме сиот наш верен народ сплотено да земе учество на овие заеднички молитви во своите парохиски храмови. За повеќе информации, Ве замолуваме контактирајте ги Вашите парохиски свештенослужители од кои ќе добиете детални информации за посочените богослуженија.
Нека Троедниот наш Бог ги прими душите на упокоените свои чеда во рајската населба, на нивните најблиски нека им дава сила и утеха, а пак на повредените побрзо закрепнување.
